《向日葵不開的夏天》
作者：道尾秀介
譯者：張佩瑩
出版社：獨步文化
ISBN：9789866954900
叢書系列：道尾秀介作品集
評分：8.0
自己一個缺點，就是太感情用事。睇小說好看電影好聽歌好，都好容易將自己代入角色，抽離唔倒。
上一次睇小說喊係睇完《秘密》嘅結局後。估唔到睇《向日葵不開的夏天》都可以睇到喊。
如果想討論《向日葵不開的夏天》，好難唔涉及謎底。不過未講到謎底之前，想提醒大家，千祈唔好睇讀後感和導讀，要睇完晒成個故事先睇其他人嘅讀後感，如果唔係就冇咁驚喜了。
以下涉及謎底，慎入！
好欣賞道尾秀介放下的clues. 我覺得都算公平，不過公唔公平已經唔係重點，對我來講本格推理的吸引，遠遠不及描寫人性的認知科學推理吸引。係度唔多講道尾放下的伏線，因為已經有其他推理同好完完整整咁解釋哂了(請看下面的links)，我只係想講下自己嘅感受。
通常如果有道夫（原來都道夫和道尾日文嘅發音係一樣！）咁嘅經歷，係成年人嘅話，我都會覺得唔應該咁執着，換過角度去諗，唔好咁樣逼死自己。但係道夫只係得九歲，佢除咗可以用自己嘅方法，令自己覺得仲有存在價值，去繼續生存係呢個世界，其實已經冇乜其他選擇。好似Momento個主角咁，要用大話令自己還有生存嘅理由，真係睇到好心痛。睇到佢嘅經歷，同埋最後媽媽叫佢個名嘅時候，我同道夫一樣，淚水決堤而出。結局剩番佢同佢自己嘅世界，仲要自己話俾自己聽冇問題啦，作者真係唔好咁殘忍啦！
佛法係講個心，道夫雖然犯下大錯，但係佢都係出於good intention. 造善業如果個心不正都係冇用，相反，做惡業如果出於好心，都不至於大錯，點解唔可以體諒下佢丫？當然佢殺老爺爺係為求自保，不過美加嘅死都唔可以完全怪佢啫，佢都係想比驚喜媽媽啫。
喜歡兒料同精神料嘅我，唔難明白點解我鍾意這些題材。Mental abuse 往往比physical abuse傷得嚴重，比阿媽neglect嘅細路真係好可憐，大個咗好難好難先可以企返起身。係，呢個只係故仔，但係道夫的處境其實係世界上每一個角落都發生過，我相信作者某程度上都係想反映這個社會問題。因為精神病佔大部份都係因為環境因素影響而觸發嘅，道夫就係一個好好嘅例子。
其實如果講詭計嘅安排，同作者的誤導能力，本作算真的不錯。不過感覺實在太黑暗，和桐野夏生同黑乙一有得比，所以好難可以話好enjoy 這本書。但係我仍然很欣賞作者嘅才華，都會繼續去睇佢之後嘅作品。
以下呢三篇讀後感，將我喺度冇講但想講嘅全部都講晒，有時間一定要睇吓。
留言列表
推理小說 (13)
